مدارس اسلامیہ کا کارنامہ

 مدارسِ اسلامیہ کے سنہرے کارنامے اور اس کے مؤثر کردار سے متأثر ہو کر تحریر کردہ منظوم کلام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ازقلم: حضرت مولانا محمد انوار الحق داؤد  نادمؔ قاسمی صاحب حفظہ اللہ 

 

مدرسہ عربیہ ہم کو پیارا لگے 

اسکا نغمہ سُہانا سُہانا لگے 

مدرسہ علم کا بہتا دھارا لگے

اس کا رِند اور ساقی توانا لگے

اسکا پرچم ہر اک سے نرالا لگے

مدرسہ عربیہ ہم کو پیارا لگے

دارِ ارقم و صُفّہ کی آواز ھے

اس میں پنہاں وہی سوز اور ساز ھے

از زمیں تا فلک اس کی پرواز ھے

روح پرور ھے اب بھی ادا ساز ھے

ملک و ملت کا عمدہ سہارا لگے

مدرسہ عربیہ ہم کو پیارا لگے

مدرسہ قوم و ملت کا معمار ھے

نیک جذبات سے خوب سرشار ھے

کتنا سندر سُہانا یہ دربار ھے

معترف جس کی عظمت کا سنسار ھے

کشتئ علم و عرفاں کنارا لگے

مدرسہ عربیہ ہم کو پیارا لگے

کتنے پیدا ہوئے اس میں اصحابِ فن 

جو بدل ڈالے دنیا کا نقشِ کُہن

جن کی  گونجی صدا انجمن انجمن 

حق کی خاطر رہے سر پہ باندھے کفن

ایسی محفل جہاں میں دوبارہ لگے

مدرسہ عربیہ ہم کو پیارا لگے

کوئی مسلمؒ بنے کوئی بخاریؒ بنے 

مدرسہ میں ہی رازیؒ غزالیؒ بنے

اور اس میں  ہی مفتی و قاضی بنے

اس میں ابنِؔ حجرؒ عسقلانی بنے

اہلِ دل کا حسیں آستا نہ لگے

مدرسہ عربیہ ہم کو پیارا لگے

بنتِ حوّا نے بھی استفادہ کیا

جن میں زینبؓ ہیں اور حفصہؓ و عائشہؓ

اور خدیجہؓ کی لختِ جگر فاطمہؓ 

کوئی کریمہؓ بنی رابعہؓ بصریہ

قابلِ رشک علمی گھرانہ لگے

مدرسہ عربیہ ہم کو پیارا لگے

فکر نو، طرزِ نو اس کی ایجاد ھے

اس کا شاہد سنو! شہرِ بغداد ھے

اک جہاں اس کی برکت سے آباد ھے

اس سے خائف سدا کفر و الحاد ھے

یہ بظاہر مگر سادہ سادہ لگے

مدرسہ عربیہ ہم کو پیارا لگے

یہ وطن میں محبت کی پہچان ھے

اہلِ دنیا پہ اس کا بھی احسان ھے

جسم ھے قوم و ملت، تو یہ جان ھے

اس سے رشتہ لگانا بھی آسان ھے

قوم و ملت کی آنکھوں کا تارا لگے

مدرسہ عربیہ ہم کو پیارا لگے

ھے اسی کی بدولت جہاں میں بہار 

ناَخَلَفْ آکے اس میں بنے ہوشیار 

اس کے پروردہ کتنے بنے تاجدار

جن کی خدمات ہیں آج تک یادگار

اہلِ تقویٰ کا یہ آشیانہ لگے

مدرسہ عربیہ ہم کو پیارا لگے

اس کی فطرت میں گردش رہی دم بدم

ہار مانا نہ یہ سہہ کے ظلم و ستم

بانٹتا ہی رہا غم کے ماروں کا غم

اسکی خوشبو سے مہکا عرب اور عجم 

اس کی ہر ہر ادا عاشقانہ لگے

مدرسہ عربیہ ہم کو پیارا لگے

ذوقِ آہِ سحر، دردِ قلب و جگر

کرکے سب سے نڈر، دے دیا، رب کا ڈر 

خودشناسی، خودی جیسے جذبات پر

ان کمالات میں کردیا پختہ تر

علم و حکمت کا یہ اک خزانہ لگے

مدرسہ عربیہ ہم کو پیارا لگے

اس پہ الزام، دہشت کا ڈالا گیا

آبرو کا جنازہ نکالا گیا

اس کی آواز کو بھی دبایا گیا

ہر طرح سے اسے آزمایا گیا

ایسے ظالم کو اب تازیانہ لگے

مدرسہ عربیہ ہم کو پیارا لگے

آبرو ان مدارس کی مولیٰ بچا

ان کے خُدّام کو سیدھا رستہ دکھا

ٹمٹماتے چراغوں کی لَو کو بڑھا

اِس کے پیغامِ حق کو مؤثِر بنا 

ہم ہوں اس کے یہ ہم‌کو ہمارا لگے

مدرسہ عربیہ ہم کو پیارا لگے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

*تاریخ: 4/محرم/1444ھ*     

*3-08-2022*