حاجیوں کے نام اک خصوصی پیغام ۔از ابن داؤد نادم قاسمی

ازقلم: حضرت مولانا محمد انوار الحق نادمؔ قاسمی حفظہ اللہ سیتامڑھی حال مقیم حیدر آباد  

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

حرم کے زائرو! کچھ سیکھ لو اب درسِ ایمانی

نہ کرنا آج سے تا موت ہرگز اپنی من مانی

وہ ابراہیمؑ و اسماعیلؑ ہوں ہا ہاجرہ ماں ہوں 

ہر اک ذرّہ میں شامل ھے یہاں تینوں کی قربانی

مروّت،غیرتِ دینی و خودداری و حق گوئی

 مزیّن کرلو اِن اوصاف سے تم اپنی پیشانی

جھلکتی ھے انہی اوصاف میں شانِ خلیلؑ اللہ

ان ہی اوصافِ سے خالی ہوئی ہے نسلِ انسانی

سرِ تسلیم خَم کرنا ھے کردارِ ذبیحؑ اللہ

اسی کردار میں ڈھل کر بنو محبوبِ سبحانی

وہ امّاں ہاجرہ جو پیکرِ صبر و تحمُّل تھیں 

زہے قسمت جو اُن سے سیکھ لو طرزِ مسلمانی

گناہوں کے اندھیروں میں ھے گم یہ زندگی اپنی

حرا کے غار سے حاصل کرو پھر نورِ قرآنی

فِنا کی سمت سے دارالبقاء ہجرت کی خواہش ہو

تو مانندصحابہ حاجیو! چھوڑو تن آسانی 

حقیقت میں خدا ھے میزباں ہر ایک حاجی کا

نبھاؤ عمر بھر اے حاجیو! تم حقِّ مہمانی

منالو حاجیو! اپنے خدا کو آج روروکر 

خدا خوش ہو تو خود ہی دور ہوگی ہر پریشانی

رہے نظروں میں طائفؔ کے سفر کا خونچکاں قصّے

کھلے گا تم پہ پھر تو زندگی کا رازِ پنہانی

وہ گھاٹی جس میں تھے محصور آقاؐ تین سالوں تک 

تصوّر ہی سے آجاتا ھے سب کی آنکھ میں پانی

نبیؐ کے دورِ مکّی کو نظر میں ہر گھڑی رکھنا

مصائب کی تپش میں ہوگی تم پہ شبنم افشانی

ہزاروں موعظت،عبرت کا مخزن شہرِ مکّہ ھے

ھے اخلاقی فریضہ تم کرو اسکی نگہبانی

حرمؔ کا اجتماع دنیا کو یہ پیغام دیتا ھے

کہ اسلامی خلافت ھے علاجِ تنگِ دامانی 

جہاں تک ہو سکے اے حاجیو! غفلت سے باز آؤ 

سدا کرتے رہو اب ربِّ اکبر کی ثناخوانی

مرے آقا کی مدنی زندگی بھی یاد رکھو تم 

یقیناً سہل ہوگا اس سے ہر کارِ جہاں بانی

خدا کے بعد سب سے گہری نسبت ہو جو آقاؐ سے

نگاہوں کو نہ خِیرہ کر سکے گا تاجِ سلطانی

تمنا عمر بھر ہوتی رہے دیدارِ کعبہ کی

رضاۓ رب ہو حاصل آج سے تا موت جسمانی

بصد ناز و ادب نادمؔ کی ھے یہ التجا یا رب

کہ اس پر کھول دے دارین میں بابِ مہربانی